Ekaristi Ndayani Semangat Ber-Evangelisasi

Pastor Sebastian Vazhkala iku mitra raketé Ibu Teresa. Mèh 30 taun panjenengané kekancan karo Ibu Teresa. Miturut Pastor Sebastian, Ibu Teresa nampi pratandha saking Gusti Yesus ing sajroning Pahargyan Ekaristi sadurungé ngedegaké Kongregasi Misionaris Cinta Kasih. Pastor Sebastian Vazhkala nduwèni cathetan asta kang diserat déning Ibu Teresa gayut pepanggihané kaliyan Gusti Yesus ing Pahargyan Ekaristi iku. Panampining pratandha Ibu Teresa dumadi wiwit tanggal 10 September 1946 nganti 3 Desember 1947. Nalika nampa Komuni Suci, Ibu Teresa kaya nampa wisik saka Gusti Yesus kang paring pangandika, “Aku ingin para biarawati India, yang mengasihi-Ku, yang mau menjadi Maria dan Marta, yang sungguh mau menyatukan dirinya dengan-Ku, memancarkan Kasih-Ku kepada jiwa-jiwa.” Pungkasané, ya lumantar pepanggihané karo Gusti Yesus ing Pahargyan Ekaristi iku, Ibu Teresa nampa berkah langsung saka Gusti Yesus kanggo ngedegaké Kongregasi Misionaris Cinta Kasih kang akèh mitulungi wong miskin, sèkèng, lan kesrakat ing India, kepara malah banjur sumebar ing saindenging donya.

Akèh Timbalan Mungguhing Kasucian kang Padha

Mbok menawa awaké dhewé naté tindak ing sawenèh papan ing Indonesia iki. Nalika tindak-tindak iku, kalamangsané awaké dhéwé nemoni wong-wong Katolik kang asalé saka Keuskupan Agung Semarang, nanging aktif banget nèng paroki kang dudu wewengkoné Gereja Keuskupan Agung Semarang. Nalika ditakoni, “Panjenengan saking pundi?”, mbok menawa padha mangsuli: “Kula saking Jogja, Magelang, Klaten, Wonosari, utawa Solo”. Semono uga ora sethithik imam, bruder, lan suster kang makarya ing ngendi-endi, malah kepara ana ing laladan Eropa lan papan misi liyané, kang uga asal saka Keuskupan Agung Semarang. Piyambaké iki sanak sedhèrèk kita umat Katolik KAS kang ngayahi karya misi sacara konkret lan peng-pengan.

Ekaristi Mbangun Komunitas

Ing paroki ndésa, apa manèh ing sawetara taun kepungkur, menyang gréja ing dina Setu sore lan dina Minggu kanthi mlaku bareng-bareng lan gegrombolan iku, mujudaké sesawangan kang lumrah. Umat lumrahé ngagem ageman kang resik lan rapi. Umat kang mlaku bebarengan ing desané iku kaya déné arak-arakan kang dawa. Sawetara taun kepungkur pancèn isih arang wong kang mangkat néng gréja kanthi nitih mobil, paling-paling nitih sepedha motor. Iki mujudaké sesawangan kang éndah lan kepara uga asung paseksén tumrap sanak sedhèrèk kang dudu Katolik. Umat Katolik katon guyub, tepung siji lan sijiné, sregep lan bungah gambira. Wong kang pethukan lumrahé aruh-aruh, “Badhé tindak greja?”

Dina kapindho

Nresnani Ekaristi lan Devosiné

Nalika lagi mangan bareng nèng ngomah, Silvi kang lagi kelas II SMA takon marang bapakné, “Pak, kok badhé wonten Kongres Ekaristi Keuskupan malih, nggih? Saémut kula sawetawis taun kepengker ugi sampun wonten Kongres Ekaristi ta? Tur malih naminé kok kongres ta, Pak? Napa nggih sami kalih kongres partai-partai niku nggih, Pak?” Pak Stefanus mangsuli, “Ya béda ta, Ndhuk, karo kongres partai kaé.... Iki rak Kongres Ekaristi. Lha Ekaristi iku waé rak mujudaké pahargyan liturgi, lha ya mesthi béda. Ning, persisé apa lan kepiyé..., bapak ya durung ngerti jé, Ndhuk.... Mbok coba golèkana néng google.” Silvi ya banjur browsing néng google, lan mbareng wis nemu banjur kandha, “Oh leres, Pak.... pancèn wonten, malah ugi badhé wonten Kongres Ekaristi Internasional, taun 2020 menika diadani wonten ing Budapes Hongaria.” Bapak lan ibuné mung mèsem karo manggut-manggut.